الأربعاء، مارس 22، 2006

فوزي إعتصامات



و الله و باضتلك في القفص ياد يا فوزي
ببس,سفن,سجاير,تسالي,شيبس,مناديل,مياه معدنية, كله موجود عند فوزي ده غير الطلبات الخاصة بالمعدة و المزاج و خلافه, يعني من الآخر أي حاجة تحتاجها أثناء قيامك بواجبك الوطني في الإعتصام أو التظاهر ستكون بين يديك بمجرد أن تطلبها من فوزي.
بات فوزي علامة مسجلة في كل الفعاليات الشعبية المناهضة للحكومة, لديه صلات قوية بناشطين في جميع الحركات التي تصبو إلى التغيير, تجده يدون في نوتته البنية الصغيرة مواعيد و أماكن التجمعات و الفعاليات, التظاهرات و الاعتصامات.. ربما كانت معلوماته هي الأكثر دقة و سرعة, لدرجة أن الكثيرين كانوا يعتمدون عليه في معرفة ساعة الصفر و حلبة التنفيذ!
ما هو فوزي من يومه إبن جنية, من أفضل من يطبقون نظرية "الرزق يحب الخفيه", واد مصراوي مخلّص و حرك, و لسانه بينقط عسل,دمه شربات,نكاته و قفشاته طازجة على الدوام, قدرته سحرية على النفاذ إلى قلبك حين يقبل عليك بوجهه الأسمر البشوش و عينيه اللامعتين ببريق الألفة و الود..
و هكذا.. احترف فوزي لعبة أو (شغلانة) البيع للمعتصمين و المتظاهرين.. فوزي أدرك بفطنته المعهودة أن مكاناً فيه تجمع بشري مُسبّب لا بد أنه منجم ذهب لا ينبغي التفريط فيه, فوزي إبن اللئيمة هبر هبرة بنت وسخة في فترة كاس الأمم الأفريقية, أعلام مصر و دهان وشوش و برانيط و طراقيع و خلافه, و سبحان الله, الحاجة اللي بيبعها فوزي ليها طعم تاني مع إنها زي باقي الحاجات اللي بيبعها ناس غيره, لكن.. فوزي و عشان هو فوزي كان معقد زملاءه البياعين قبل و قدام الاستاد, إسلوبه و طريقته و حلاوة لسانه كانوا بيعملوا عمل السحر.. فوزي كان نفسه البطولة ما تخلصش بالسرعة دي بعد ما عمل زباين سوبر لوكس بتروحله بالإسم.. و كان إسم الشهرة و قتها "فوزي أمم" !
"فوزي أمم" خلاص انتهى موسمه, و جاء وقت "فوزي إعتصامات"
كم بارع أنت يا فوزي في معرفة ما يحتاجه البشر, و كم أنت بارع في فهمك لطبائع الأشياء..
دائماً لك لمساتك الخاصة على كل "شغلانة" جديدة..
تدرس المكان,و الحدث,والناس.. تقدم لهم ما يريدون أو حتى ما لم يعتقدوا أنهم يريدون..
كنت مبدعاً كالعادة أثناء الاعتصام الأخير..
أدركت أن الوقت سيطول هذه المرة.. و لا بد للسجائر أن تنفذ.. و لا بد أن من بحت أصواتهم في الهتاف الحماسي, سيحتاجون لزجاجة مياه أو علبة عصير.. سيكون كيس شيبس أو قطعة شيكولاتة ضرورة حتمية لتجديد النشاط أو سد جوع يتم نسيانه أثناء تعالي الموج, لكن لا يمكن تحمله فيما بعد.. و لأن المعتصم يفضل الثبات في موقع إعتصامه, فلا غرابة في أن فوزي كان يساعد المعتصم على التركيز في اعتصامه, و عدم شغل تفكيره بكيفية إحضار "البيتزا" من المطعم المجاور!
و لأن فوزي جنتل و ابن بلد كان يقوم بمرافقة السيدات إلى "بيوت الراحة" أثناء انشغال الرجال بتصعيد التفاعل الجمعي.
فوزي لم يقصّر حتى في "الطلبات الخاصة" من دواعي الكيف و خلافه للإخوة الذين يحتاجون ضبط الطاسة لمزيد من التجلي.. ما أحلى الهتافات الجديدة غير المرتبة, الهتافات البكر, وليدة اللحظة..
أكثر ما أضحكني ذلك اليوم.. هي كمية صور الرئيس و نجله التي حصل عليها فوزي من إحدى مقار الحزب الوطني.. و طبعاً الصور كانت "خام" مش متزوقة, و لأنه شئ لزوم الشئ.. طبعاً فوزي جاب أقلام الفلومستر الحمراء المكلبظة لعمل "الإكسات" و خلافه, فربما زاد عدد الملتحقين بالاعتصام ممن لم يجهزوا أنفسهم بلوازم الفعالية.. كانت الصورة "الخام" بعد زنجفتها تستحق أكثر من جوز جنيهات, لكن فوزي كان بحداسته و شطارته يتوقف عند حد لا يدع مجالاً لأحد أن يصفه بانه يصطاد في المياه العكرة لا سمح الله!
أقطع دراعي يا فوزي إن ما كنتش جبت الشيروكي.

أحه بجد يا فوزي..


ملاحظة 1: فوزي ده غير فوزي اليساري بتاع الحدوتة و كمان غير فوزي المجنون بالنوكيا و مالوش علاقة بأحمد فوزي اللي الزميل أنا طلّع ميتين كس امه.
ملاحظة 2: فوزي مالوش دعوة بالخناقة بتاعة مشكلة النسوان و السجاير و التي أثيرت عند علاء.
ملاحظة 3: السجاير و علبة التونة اللي نزلت أجيبهم مش من عند فوزي.
و للحديث بقية, بس أحه, وحشني المكان و وحشتوني.

15 تعليقات:

theSamo يقول...

هاها
جامدة كالعادة يا أبو الليل

Rania يقول...

7amdallah 3ala el salama.leek wa7sha.
elle zay Fawzy da ketteeeer aweee.
7atta belamarra esmo el 7akekee sawsan.

Alaa يقول...

طب احبكها يا أخي، بص على الصور و اكتب حاجة تمشي عليهم مش أي حاجة و السلام

أبو الليل يقول...

سامو:قشطا
رانيا: الله يسلمك يا رب, و حلوة حتة سوسن بتاعة سمير غانم, فووووزي..

علاء:
طيب دحرج المسا الأول
انا مش عارف مشكلتك مع أي صورة بالظبط
و لو فيه حاجة مش عاجباك في الصورتين أشيلهوم خالص و لا تزعل.
بعدين هنا "يا خي أحه" مش يولاندس بوستن.
:)

دعاء يقول...

حمد الله عالسلامه يا بو الليل انا مش قادرة أبطل ضحك الله يسامحك
بتجيب الأفكار دي منين؟
قوية جدا بصراحة

Duke يقول...

رغم انى عارف انك رايح تجيت مشوار سريع لمدده اسبوعين بس كنت متاكد انك مش هاتطيق الغيبه دى كلها و هاترجع بسرعه
بس انا عندى كام سؤال هو مين يحى الى اغتصب احمد فوزى اغتصاب جماعى
هو مش كام سؤال هو سؤال واحد مساء الفل وحمدالله على السلامه يابو الليل يازعيم

أبو الليل يقول...

دعاء
الأفكار بتيجي لحد عندي أنا ما بروحش لها
:)
dukejim
مسا الفل و الجمال
:)

kalam يقول...

تصدق بالله
انت شوقتنى اشوف فوزى
مش كل يوم بتلاقى واحد بيشتغل كده بزمه يا اخى
طب بزمتك مش لو وعدك يشتريلك حاجه حتى لو لبن العصفور
مش هتبقى مطمن انه هيجيبه
فوزى تخليص

أبو الليل يقول...

ميزة فوزي إنه بيحافظ على إسمه, وده جزء مهم من استمراريته يا كلام.
و حتى لو كان فوزي مجرد بطل حدوتة أكيد حتلاقي فوزي تخليص الذي تحتاجه.

Alaa يقول...

مش قصدي الصور اللي أنت حاططها يا مفتح

قصدي أن قصتك مش محبوكة لأن تفاصيلها متمشيش مع اللي حصل يوم الاعتصام و بما أنه الاعتصام الوحيد اللي في الشارع من زمان يبقى لو عايز تحبك القصة ظبطها مع الوصف و الصور اللي اتنشرت عن الاعتصام

أنا يقول...

يا علاء :-
دع الرجل يشوف شغله
ويا ابو اليل :-
حمد لله علي السلامة الاول من رحلة صيد التونة وبعدين يا خي انا اسمي يح مجاهد مش "انا"؟؟
دي حاجة تبضن برضه اني اكون قاصد ابضن الناس فلاقي حد بضني !!
وبعدين تعالي بقه نتكلم جد ..منكرش طبعا ان فيه ناس كتر زي اخونا "فوزي اعتصامات" لكن صدقني لو قلتلك ان فيه قده خمسين مره بيعملوا ده بجد لانهم مصدقين فيه ومؤمنيين بيه
لطيف اني افضح اللي زي فوزي
لكن ده اول اعتصام فعلا ننظمه من 324 سنة , اتمني انك تكون موجود في الاعتصام الجاي
ومتجبش فوزي معاك

أبو الليل يقول...

علاء
حبقى أحبك (الحواديت) على مقاس رضا معالي جناب سعادتك و لا تزعل.

مجاهد (أنا) سابقاً
أهلا بيك يا يحيى يا مجاهد, و حقك عليا العتب عالنظر, و ما عاش و لا طلعت عليه شمس اللي يتجرأ و يفكر يبضنك
فوزي دلوقتي تلاقيه بيقلب رزقه في حدوتة تانية..
صباحك فل

Alaa يقول...

أيوه كده فلد عرفتي مقامك

مين هينا و رايح تبعتي الحواديت لحضرتنا الأول و أحنا نحبكها و نصلحها و نوافق على نشرها، فهمتي فلد؟

أبو الليل يقول...

حظرتنا فهمت أفندينا
بس بلاش تحبسونا في الأستانة
شكلك عسل يا علاء و انت دكتاتور
أحه

ألِف يقول...

ربنا يسهله و يفتح فرانشيز لخدمة المتظاهرين في فرنسا اعتراضا على قانون العمل و يبقى يجيبلهم كرواسون و سجاير فرنساوي بالنعناع.