السبت، نوفمبر ١١، ٢٠٠٦

أنا يا عمرو (فهمي) على قدّي



هو من المفترض يا عمرو إنك بترمز (لمصر) بالوليّة اللي شايلة بوكيه الورد (الفوشيا)؟
و لا بترمز (لمواطنة) مصرية بسيطة قد تكون (فلاحة) مثلاُ زي ما جبت (مواطن) مصري بسيط في رسمك الأسبوع الماضي؟
عندي إنطباع إنك تقصد بالولية دي (مصر) زي ما سبقك كثُر من رسامي الكاريكاتير, ساعات يحطوا على دماغ الفلاحة المصرية تاج عليه الأهرامات التلاتة, و ساعات يكتبوا كلمة (مصر) صريحة و يلطعوها فوق دماغها على سبيل (الرمز) و بعيداً عن الهمز و اللمز لا مؤاخذة..
هي مال (مصر) في رسمك طالعة هطلة كده؟ مال ضحكتها بلهاء كده؟ و ليه لابسة (حماها الله) غوايش (بلاستيك حمرا) في إيدها اليمين في حين إن إيدها الشمال متسيّغة بغوايش عيار24 ؟
جايز يا عمرو (فهمي) على قدّي, أصلها ممكن تزيح حبة من اليمين و ترمي الغويشتين العرّه اللي في اليمين, و لا هي عشان (طيبة) لازم تكون هبلة و ما عندهاش ريحة الذوق؟
و لا جايز أنا مش واخد بالي و تكون راسم الغويشتين الحمر على أساس إنهم دهب أحمر يعني, و لا ده اكسسوار فالصو بتاع المسرح و الرسم و كده؟
و اشمعنا صدرها مكور و متين و شامخ كده؟ ده دليل (الأمومة) بحيث تحس إنه حينفجر من كمية اللبن اللي فيه, و لا ايه النظام بالظبط؟
بس تخيل.. لون الروج ماشي طحن مع بساط التشريفة الطويييييل على امتدا السلّم الطويييييل بالضرورة..
بعدين هي واقفة (تحت) و باصّة فين بالظبط؟ اللي قدامي إنها معجبة بالكرافتة المقلمة بالورب..
و إيه أم بوكيه الورد الفوشيا اللي متستف عند محل الورد اللي جنب شيراتون القاهرة..؟
بعدين ليه (الريّس) مش باصصلها و لا معبرّها؟ مع إنها سايبة كل حاجة و متسيغة و متأيفة و مجهزة اللبن و مبستراه في صدرها و رافعة الورد الفوشيا (اللي المفروض بيحمله ولد و بنت صغننين عكاريت, و ما بيبقاش فوشيا), و جاية تستقبل إبنها البارّ اللي وحشها قوي قوي؟
هو الريّس باصص فين؟ و بيشاور لمين؟ و إيه الشياكة دي؟ البدلة منحوتة زي السيف الحقيقة..

يعني يا عمرو يا (فهمي) على قدي: كانت اتخربت الدنيا لو الريس (انحنى) على راس (مصر) و باسها؟
و لا كانت البدلة حتتكرمش لو نزل و خدها في حضنه؟

عمرو فهمي : أنت أسأت لمصر, و أسأت للرئيس, و أيضاً أسأت لفن أحبه يدعى كاريكاتير..
هل يحترمك من يحب الرئيس فعلاً..؟
و هل يحترمك من لا يحب الرئيس فعلاً..؟
و في كل الأحوال,هل يحترمك الكاريكاتير فعلاً!


يا خي أحه..


19 تعليقات:

Ahmed Shokeir يقول...

رسومات عفا عليها الزمن ، الرسومات دي ولت من تلاتين سنة
هي الناس بهايم مابتتعلمش هو بيضحك على مين وعايز اعرف وهو بيرسم الكاركاتير كان فاكر الناس هاتضحك على ايه او ايه المبالغات اللي في التشخيص اللي تلفت النظر

المصيبة ان نوعية الرسومات دي كنا نسيناها
ايه بس اللي فكر امه بيها تاني وكمان في الزمن المزهزه ده ربنا يزهزه قادر ياكريم

بس فاتك يابو الليل الامن المركزي اللي في الصورة

عمر يقول...

بجد يابو الليل.. أحه! شردت للجدع الرسمة اللي بقاله اسبوعين بيحنتف فيها! والله افحمتني وافحمت فهمو علي قدو.. اضحكتني وابكيتني يا فتي في نفس الوقت، معرفش ازاي

SOLITUDE® يقول...

البدلة بتفكرني ببدلة أدهم صبري بتاع رجل المستحيل
نفس البدلة اللبني والكرافتة المقلمة

ههههههههههه

تمر حنه يقول...

عموما الورد الفوشيا أنضف من الزلعة اللى بيشيلها لمصر - أنا كل اللى شاغلنى دلوقتى موكب التشريفة و ميعاد درس الواد و طريق العروبة- ماهو عمرو و أمثاله دول اللى مخللين العالم فاكرنا بنركب جمال لحد دلوقتى - هو مش واخد باله اننا بستورد القمح من السعوديه جلابية أيه يا أمور؟؟ ... اصحى ... فوق ياخى آآآآآآه

أبو الليل - مقدرتش أطالع التدوينة السابقة - قلبى أضعف من ذلك ...يكفى قلبى نزفا

قبل الطوفان يقول...

تحياتي لك أيها الرجل الذي يظل حضوره بهياً وغيابه أقوى من حضور الآخرين

وتقديري لصديق اختار أن يكون صاحب موقفٍ في زمن وضع فيه كثير من الكتاب على أفكارهم لافتة "للإيجار"

MAKSOFA يقول...

الحقيقه
أن عمرو فهمي
توقف عنده الزمن من حوالي 30 سنه
لأنه راسم صورة للريس
وهو عنده يمكن 45 سنه يعني من زمان قوي ايام ماكان شباب
وكمان زهقنا بقي من صورة مصر التقليديه دي
مايغيروها شويه
والا هو فالح بس يعمل صدرها منفوخ زي
صدر اليسا
ليه هي الست مصر دي
ماحبلتش ولا ولدت
والا هي فنانه بيجبوها وقت اللزوم تستقبل الريس

تحياتي لك يابو الليل
بعد أذنك أنا حطيت اللينك الخاص بمدونتك الرائعه لتزين اللينكات في مدونتي
وكمان أول لينك
لأنك فعلا جميل
يابو الليالي

Ahmad Gharib يقول...

دة التحول الطبيعى للحاجة الساقعة

بدل ماسيادتة يبقى خدام عند مصر بقت مصر هى اللى خدامة عندة

وعلى فكرة ماتزعلش من عمر التعريص دة بقة هو الواقع

وعجبى

LeMeD يقول...

والله انا مش شايف ان في مشكلة خالص الصورة معبرة عن وضع مصر حالياً ومعبرة تماماً عن وضع الريس الشيك اللي مش معبر اي حد ولا في دماغه اصلا اي حاجة مع العلم ان عمرو فهمي مالوش في البطاطا بس نئول ايه بس تيجي مع الهبل دوبل ..

علان العلانى يقول...

العزيز أبو الليل
المساحة بين الألم و الصمت على ما يحدث فى فلسطين والعراق وبين العجب والصمت فيما يحدث من حولنا فى كل موقع ليست بعيدة كما يبدوا بل هناك خيوط كثيرة تجمع بين هنا وهناك، تكشف تلك التدوينة كيف و لماذا تستمر الركاكة وتستمرء ويطبع نهجها فأمثال عمرو فهمي فى كل موقع يعكسون وجه النظام لا وجه مصر فوجه مصر لاينعكس على سطح البرك الراكده ولا يشرق فى أجواء تلك الغيوم الكالحة ، وهذا هو الواقع الكاريكاتيرى هنا وهناك الذى يدمغ كل شىء ليصبح راسم الكاريكاتير و جهله برسالة وفلسفة فن الكاريكاتير هو موضوع الكاريكاتير وكأن الفن يسخر من مدعيه غمرك الله بنورهناك ليعينك على الرؤية هنا و ليدوم لك الانتباه

السهروردى يقول...

واحد حرامى بيسرق رسومات صلاح جاهين وعنده فقر فى الإبداع بعيد عنك عايز إيه أكتر من كده ؟
أجمل إنسان رسم مصر فى الكاريكاتير الجميل حجازى ولا جه بعده ولا قبله
وده بإعتراف ناس كتير جدا من رسامين الكاريكاتير
صدق من قال الأنصاص قامت والقوالب نامت

غير معرف يقول...

يا أخ ابو الليل اتمنى منك ان تشيل صورة المتناك اللى اسمة كريم :المدونة بتاعتك من احب وافضل المدونات بلاش تخلى الواحد يغير فكرتة عنك
مبروك للاهلى و كسم كريم

غير معرف يقول...

و الله عمرو فهمي شخص يحرق الدم فعلا يا رب ارحمنا منه و من امثاله
يا أخ شريف انتا باين عليك مش واخد بالك من فكرة الصورة بتاعة البانر ابو الليل بيتريق عليه وعلى اللي وراه

غير معرف يقول...

شكرا على لفت الأنتباة
ماكنتش واخد بالى
مبروك للأهلى وكفاية شتيمة فى كوكو كفاية اللى بيحصلة

أبو الليل يقول...

ملاحظة: أحب الرد على كل تعليقاتكم, و أعلم أنكم تتفهمون تقصيري في هذا الصدد, يعني ردي على تعليق معين دون آخر لا يعني تجاهلاً أو تكاسلاً,و ما أجمل الشعور (بالرحرحة) التي تأتي بعد التواصل الحقيقي, و الذي يلغي من قاموسه مصطلحات كثيرة مثل (التبرير) أو (المجاملة) أو.. أدري تماماً أن هذه الملاحظة قد تكون (عبيطة) لغالبيتكم.. أسعد الله أيامكم
و نورتوا بيتكم و مطرحكم
:)
بس خلاص

الكاريكاتير اللي تحت ده للجميل حجازي و فك التكشيرة يا سهروردي
:)


محبتي لكم جميعاً

adhm يقول...

يا جماعة
الشىء من معدنة لا يستغرب
زمان قالوا كدة
والاخ اللى ابو الليل سيحلة وخلاة شوارع ماهوش شىء شاذ عن النظام القائم ابدا ابدا الراجل متوافق جدا مع الحالة الموجودة فى البلد
ووصف برسمتة االبسيطة دى الخريطة السياسية للبلد وطريقة تعامل النظام مع البلد ونظرتة ليها
انا اعتبر الرسمة دى خريطة للواقع
وعمرو فهمى هو دافنشى مصر
ودى شفرة عمرو مش شفرة دافنشى الفاشل
الى الامام يا عمرو
يا اخى ابوالليل

قلم جاف يقول...

رحم الله محمود كحيل وناجي العلي..

Polka Dotted يقول...

enta neset 7aga mohema
el rayes mn emta ba2a yero7 el gym w b2a gesm rasheek w 3adalat !!!

غير معرف يقول...

السلام عليكم ابو الليل الجميل يابني المدونة جامدة جدا
واديهم علي دماغهم متعتقهمش

غير معرف يقول...

ابو الليل الى اين؟!
الى اين يأخذنا ابو الليل؟ الى اين تأخذنا يا ابو الليل؟ الى اين تأخذنا المدونات؟
اعتقدت ان موجه المودونات هى موجه "التبصير" يكشف فيها كل من يرى شىء فى اى شىء يكشف ما يراه للغير
حتى اصبحنى نعرى كل شىء(لا اقصد طبعا الاجساد) وكأنه اصبح فقط هذا هوه الهدف
ماذا بعد؟ هذا هو السؤال. هذا هو السؤال الذى يجب ان يسأله لنفسه صاحب المدونه ومن يقرأ المدونات
ارى فى كثير من المدونات آراء غاضبه ناقده وفى بعض الاحيان ساخره هل هو غضب لمجرد الغضب لمجرد السخريه
لا اظن ذلك لاكنى لا ارى احد يعرف ماذا بعد هذا كله لا احد يعطى حلول لا احد حتى يعطى افكار اصبحنا فقط نفكر كيف نغضب وكيف نثور