الجمعة، فبراير 17، 2006

"رحابي" هل أنجبتِ يوسف؟

من عشر سنوات كتبتلك الكلام ده فاكره؟
طبعته على ورق كتير..
لقيت ورقة منهم, و لقيتني بانقلها على مدونة "يا خي أحّه"
مش عارف فين البضان بالظبط, يمكن عشان قصتنا موجعة؟
مش مهم مين وجع مين يا رحاب, عدت سنين كتير , عشر سنين أو أكتر..
خلفتي يوسف؟ سعيدة؟ عايشة و لا ميتة؟
في كل الأحوال.. أتمنى تكوني بخير و سعادة, إنتي اختفيتي, و أنا ما دورتش, و تخلص حكاية..
كبرنا يا رحاب صح؟
كبرنا و الله..
ممكن يكون احتمال واحد في المليون إنك تتكعبلي في "يا خي أحّه", و ممكن لأ..
لو حصلت الصدفة الأسطورية و اتكعبلتي هنا..
عايز منك ابتسامة جميلة, و انتي بتفتكري كلام كتبتهولك من عشر سنين!



تعالي حبيبتي نداعب الصمت في ليل السكون
تعالي نطرز الأحلام على ثوب من الجنون
تعالي نعاهد الفراشات الجميلة
عهداً باحت به ذات مرة لغة العيون

تعالي حبيبتي نبدل ترتيب خلايانا
تعالي نبعثر شوقاً هام, فذاب قلبانا
تعالي ننثر الزهر مدناً في طريق نجوانا
أحبك أكثر و أكثر في كل مرة!
و أعشق عمري في كفيك بستانا

اقتربي أكثر..فأنا أكره أن تكون بيننا مسافة
الفراغ مسافة
الثياب مسافة
البشرة مسافة
الدماء مسافة
العظم و النخاع مسافة
كم أكره المسافة بيني و بينك..
صدقيني حبيبتي...
أنا لا أعيش في وهم الخرافة
لست خليفة من زمن الخلافة
اقتربي أكثر و أكثر
فحين تلمسين قلبي

تشتعل النجوم...
و تحترق المسافة.



13 تعليقات:

سنوحى يقول...

جميلة فعلا
يعنى محتاجة شوية وزن وقافية والحاجات دى انما حلوة اوى فيها فيها إحساس يمكن الحاجة الوحيدة اللى عليها القيمة وسط الشتايم دى كلها

rasha يقول...

very nice

غير معرف يقول...

على فكره يا بو الليل إسلوبك روعة, يا ريت تطلع المستخبي

m a s r i s t يقول...

كويس الكلام ده، يا ريت بقى تعيش شوية في المنطقة دي، كلنا عندنا حب عدى في يوم علينا وكل واحد عايز يكتبله حاجه...
برضه كل واحد عنده دينه أو مش دينه ويا ريت تسيبك من الكفرة أو اللي مش كفرة وتخلي الحياة سهلة
الكافر كافر لنفسه ومن حقه يشهر ده و من حقه يبني آراءه زي ما هوه عايز زي ما المؤمن من حقه يقف فوق المدنه ويزعق قد ما هوا عايز... ما حدش عمره قال أن المؤمن ليه حقوق أكتر لمجرد أن المؤمنين أكتر أو أنهم أشد و أجمد... محمد بدأ دعوته ضد حشد كبير من الناس وحارب علشان يوصله... أظن ما يرضيكش أن النهارده المجتمع اللي كبر 3000+1400 سنة يتعامل بنفس منطق قريش مع المختلفين معاه، يعني يتهيألي في قيمة للتطور في الزمن بصرف النظر ده حصل في الغرب ولا في الشرق.... كافر

أبو الليل يقول...

شوف يا مصريست
أولاً شكرا للنصيحة العبقرية إني أكتب حاجات حيادية و إنسانية و الاهم إنها ما تتعارضش مع آراء حضرتك..

إنت حر تكون ملحد أو جن أزرق ده مع نفسك, بس لما تقل أدبك على أصحاب عقيدة من مسلمين أو مسيححين و تسخر منهم و تستهزئ بإنسانيتهم
ساعتها أقولك أحه و ميت أحه كمان..

و بلاش تدخل تجارب الأنبياء مع تجارب الكره بتاعتكم

أنا مش حدخل معاك مناظرة دينية لأني مش متحدث باسم التيار الأسلامي أو المسيحي, أنا مجرد إنسان مصري بسيط مبضون من حاجات أهمها تلذذكم بالإساءة للعقائد السماوية لمجرد الإساءة لا أكثر..
ثم تتشقون بعد ذلك بوقوعكم تحت نير الاضطهاد الفكري,, و الإرهاب الديني و شوية البقاق الحمضانة اللي قرفنا منها و من مساختها..

بعدين اقرا المدونة كويس حتلاقي رد مفصل, و مش عارف اشمعنا لطعت تعليقك في تدوينة ليس لها علاقة بموضوعك "الجوهري" أيها الجهبذ الحنجوري

ألِف يقول...

فرض: أنا كمان ما يهمنيش عقيدة أي شخص.
سؤال: هو حضرتك شايف أن سباب الملحدين للمؤمنين عيب، لكن سباب المؤمنين للملحدين مش عيب؟
سؤال احترازي: إذا كانت إجابتك على السؤال اللي فات "نعم" قهل دا لأانك شايف أن المؤمنين أساسا أفضل من غير المؤمنين؟

Duke يقول...

ياباشا على الرومانسية ، على فكرة الدنيا صغيرة ومن الممكن جداّ انها تتكعبل فى "يخى احة

أبو الليل يقول...

الأخ ألف

سباب الملحدين لتصرفات خاطئة من مؤمنين هو أمر منطقي إلى حد ما بغض النظر عن توصيف "نوعية و هدف الإلحاد"
و ستجد المؤمنين (الحقيقيين) أنفسهم هم أول من يهاجمون التصرفات الخاطئة
أما سباب الملحدين للمؤمنين لأنهم مؤمنين فدا كخة قوي
و سباب المؤمنين لملحدين يؤذون مشاعرهم و يسخرون من عقيدتهم و يتهكمون على أنبيائهم مش عيب أبدا خالص بتاتا


DukeJim
شفتني و انا روماننسي؟
احتمال ضئيل جدا تتكعبل هنا بس على رأيك الدنيا صغيرة يا صاحبي.

salah يقول...

أمشي يلالا جاك وجع في قلبك, خلينا في ولاد الكلب بتوع الديموقراطيه احسن

غير معرف يقول...

وجعت قلبي يا ابو الليل، بس انت عملت الي هيعمله الأصيل والعاقل ،، انشاء الله ربنا هيرزقك بواحدة تقدر دماغك الفولاذية ،، يخرب بيت الحته الحمرا "القلب" الي جوا البني ادم الي بتخليه يدنجل في الحياة.
احه حزينة يا ابو الليل
وشخرة تنم عن الانفطار

تحياتي

وليد

CHICO يقول...
أزال المؤلف هذا التعليق.
CHICO يقول...

بحبك اوى يا ابو الليل

maizyada يقول...

بحبك يا ابو الليل
بحبك بجد
الف سلامة على عيونك يا جميل
يارب تقوم بالسلامة
انا بحبك رغم قلة ادبك و الفاظك الزبالة
انت رقيق مهما حاولت تتظاهر بالخشونة أو الغلظة
رقيق وموهوب و جميل
تعرف
انا مش نفسى اشوفك
كان نفسى اكون واحده من الناس اللى بيكونوا معاك كل يوم
اختك او مامتك
ناس من اللى مش بتفكر فيهم كتير لانهم معاك
لكن فى نفس الوقت مكانهم معروف و محفوظ وغاليين عليك يا غالى
خللى بالك من صحتك يا ابو الليل
يا جميل